Ein av fordelane med GIMP er at det er lett å utvida funksjonane ved hjelp av såkalla programtillegg (engelsk: «Plugins» eller «Plug-ins»). Programtillegga samarbeidar svært nær med GIMP, men det er GIMP som har kontrollen med dei. Ofte gjer ikkje programtillegga anna enn det du også kan gjere direkte, men på ein for deg enklare måte. Den store fordelen med desse programma, er at det er lett å laga tilleggsfunksjonar utan å måtta gjera endringar i det nokså kompliserte programmet GIMP er. Mange verdfulle programtillegg har ei kjeldekode på berre 100 - 200 linjer. Dei fleste er skrivne i språket «C» eller ein variant av dette.

Fleire titals programtillegg er inkluderte i grunnutgåva av GIMP, og vert automatisk installerte saman med GIMP. Dei fleste av desse er tilgjengelege gjennom menyen Filter. (Alt i denne menyen er faktisk programtillegg). Ein del av programtillegga er likevel plasserte i andre menyar. Som oftast merkar du ikkje at funksjonen du nyttar deg av er eit tillegg. T.d. er funksjonen «Normaliser» for automatisk fargekorreksjon eigentleg eit programtillegg, men det er ingenting i måten det arbeidar på som røper dette.

Kven som helst kan skriva eit programtillegg for GIMP og gjera det tilgjengeleg på nettet. Du kan få tak i mange nyttige programtillegg på den måten. Nokre av dei er omtalte andre stader i denne brukarhandboka.

Sidan dette er fritt tilgjengeleg, følgjer det med ein viss grad av risiko. Det faktumet at kven som helst kan gje ut programtillegg betyr at det ikkje er nokon effektiv kvalitetskontroll. Programtillegga som vert leverte saman medGIMP er testa og finjusterte av utviklarane. Andre programtillegg som er tilgjengelege på nettet kan vera sett saman i løpet av nokre timar og deretter gløymde. Nokre av dei som skriv programtillegg bryr seg lite om programma er robuste, og sjølv for dei som ger det, er evna deira til å teste dei på alle slag system i ulike situasjonar avgrensa. I utgangspunktet, når du lastar ned eit programtillegg får du noko gratis, og nokre gonger får du nett det du betalar for. Dette er ikkje skrive for å ta motet frå deg, berre for å vera sikker på at du forstår at ikkje alle programtillegga som er tilgjengelege på nettet vil levera det du ventar av dei.

Oftast vil du kunna bruka eit programtillegg i GIMP utan å bry deg om eller merkja at det eigentleg er eit tillegg. Det er likevel nokre småting med programtillegga som det kan vera nyttig å kjenna litt til.

Det eine er at programtillegga som oftast ikkje like robuste som programkjerna i GIMP. Når GIMP krasjar, vert det sett på som noko svært alvorleg som kan føra til mykje trøbbel og hovudverk. Når eit programtillegg krasjar, kan du ofte likevel arbeida vidare med GIMP utan å bry deg meir om heile krasjet.

På grunn av den måten programtillegga kommuniserer med GIMP på, har dei ingen måte å få greie på endringar du har gjort i biletet etter at programtillegget har starta. Viss du køyrer eit programtillegg og deretter endrar biletet ved hjelp av eit anna verktøy, kan programtillegget krasja. Sjølv om det ikke gjer det, kan dette føra til feil resultat. Du bør unngå å køyra meir enn eitt programtillegg om gongen på eit bilete, og unngå å gjera noko med biletet før programtillegget er ferdig med det. Viss du ignorerer dette rådet, er det stor sjanse for at du endar opp med eit øydelagt bilete i tillegg til at også angreloggen er øydelagt. Du kan altså heller ikkje tilbakeføra biletet til slik det var før krasjet.

Programtillegga som vert leverte saman med GIMP treng ikkje installerast. Det må derimot programtillegg som du lastar ned sjølv. Til vanleg er standardplasseringa for desse i GIMP si brukarmappe under /plug-ins, der mappenamnet må vera det same som filnamnet til programtillegget. Du kan finna standardplasseringane der GIMP søkjer etter programtillegg i mappepreferansane til GIMP. Der kan du også leggja til nye stadar der GIMP skal sjå etter programtillegg. Det er fleire måtar å gjera dette på, avhengig av kva operativsystem du brukar og korleis programtillegget er strukturert.

Har du ønskje om å læra å skriva programtillegg, kan du finna mykje hjelp på utviklingssidene til GIMP[GIMP-DEV-PLUGIN]. GIMP er eit nokså komplisert program, men utviklarane har lagt mykje arbeid i å flata ut læringskurva for å laga programtillegg. Du finn fyldige instruksjonar og gode eksempel på dei nemnde sidene. Hovudbiblioteket («libgimp») som programtillegga nyttar for å kommunisera med GIMP, er i tillegg veldokumentert. Ein mykje brukt måte for å læra seg programmeringa, er å modifisera eksisterande program. Dyktige programmerarar er dermed ofte i stand til å laga svært så interessante ting berre etter eit par netters arbeid.