Å beskjere eit bilete er å klippa bort bestemte delar av det. Det kan vere mange grunnar for å beskjere eit bilete. Kanskje ønskjer du at biletet skal fylle ei ramme eller du føler for å fjerne ein ubrukbar bakgrunn for å markera hovudmotivet betre. Du kan aktivere beskjeringsverktøyet ved anten å klikke på symbolet i verktøykassa (den enklaste måten) eller frå menyen Verktøy → Transformeringsverktøya → Beskjer. Når beskjeringsverktøyet er aktivt, vil markøren forandra seg, og du kan klikke på eit vald startpunkt og dra eit rektangel ut på biletet så lenge du held museknappen nede.

Klikk på eitt av hjørna i klippeområdet og dra musepeikaren for å få fram beskjeringsrektangelet. Skulle du ha vore litt unøyaktig, kan du finjustere seinare.

Når klikk og dra er utført, vert eit rektangel med spesielle område synleg på biletet. Når du flyttar markøren over dei spesielle områda, endrar han utsjånad. Du kan no dra i hjørna eller kantane på rektangelet for å endra storleiken på det. Som vist i biletet over, vert storleiken og sideforholdet for rektangelet vist på statuslinja. Dobbeltklikk inne i rektangelet eller trykk Enter for å fullføra beskjeringa. Du finn meir om beskjering i Del 4.4, «Beskjering».

Dersom du ønskjer å beskjera biletet i eit bestemt sideforhold, som for eksempel eit rektangel, sjå etter at innstillingane for verktøyet er synlege ( Vindauge → Dialogvindauge → Verktøyinnstillingar). I verktøyinnstillingane for rektangelutvalet skal det i ruta etter «Fast» stå «Sideforhold». Du kan no skriva inn sideforholdet i ruta nedanfor. For eksempel «1:1» for å laga eit kvadrat.

Det er også kontrollelement for å endra aspektet frå liggjande til ståande. Etter at du har sett sideforholdet, dra i eitt av hjørna i beskjeringsrektangelet for å oppdatere det. Rektangelet vil endra seg til det valde sideforholdet, som vil vera konstant sjølv når du endrar eller flytter rektangelet.