2.3. Ellipseutvalet

2.3. Ellipseutvalet
	2. Utvalsverktøya

Figur 14.14. Symbolet for «Ellipseutvalet» i verktøykassa

Dette verktøyet vert brukt for å laga elliptiske (ovale) eller sirkelrunde utval i eit bilete, eventuelt med høgkvalitets kantutjamning om du ønskjer det. Du finn meir om utval og korleis dei vert brukte i GIMP i Utval. For informasjon om funksjonar som er felles for alle utvalsverktøya, sjå Utvalsverktøy.

Du kan også bruka ellipseutvalet til å teikna sirklar eller ellipsar på eit bilete. Lag eit ellipseutval og fyll dette ved hjelp av fyllverktøyet. Ønskjer du å berre teikna omrisset, kan du i staden streka opp utvalet med høveleg farge og strøk. Ein annan metode som er vanskelegare, men gjev betre kvalitet, er å laga to konsentriske elliptiske utval med litt ulik storleik og subtrahere den inste frå den ytre. Dette er ikkje alltid like lett å få til. Kommandoen Utval → Ramme … gjer det enklare.

2.3.1. Å slå på verktøyet

Du kan henta fram ellipseverktøyet på mange måtar:

Frå biletmenyen via Verktøy → Utvalsverktøya → Ellipseutval,
Ved å klikka på verktøysymbolet i verktøykassa,
Ved å bruka tastesnarvegen F.

2.3.2. Valtastar

	Notat
	Mange av valtastane er meir eller mindre felles for alle utvalsverktøya, og er nærare omtalte i Del 2.1.1, «Valtastane (normalinnstillinga)». Berre tastekombinasjonar som er spesifikke for dette verktøyet er omtalte her.

Ctrl: Trykkjer du ned Ctrl-tasten etter at du har byrja markeringa, og held han nede til du er ferdig, vert startpunktet brukt som sentrum i ellipsen i staden for å verta eit av hjørna i det tenkte rektangelet som omgjev ellipsen. Trykkjer du ned Ctrl-tasten før du byrjar markeringa, vert det nye utvalet trekt frå det eksisterande utvalet.
Shift: Trykkjer du ned Shift-tasten etter at du har byrja markeringa og held han nede til du er ferdig, vert utvalet avgrensa til ein sirkel. Trykkjer du ned Shift-tasten før du byrjar markeringa, vert det nye utvalet lagt til det eksisterande utvalet.
Ctrl+Shift: Ved å trykkja på begge tastane vert dei to effektane slått saman og gjev deg eit sirkulært utval sentrert på utgangspunktet ditt.

2.3.3. Å bruka verktøyet

Figur 14.15. Eksempel på ellipseutval.

Når ellipseverktøyet er i bruk, vert dette vist ved at musemarkøren syner ein sirkel. Verktøyet teiknar ein sirkel eller oval inne i eit rektangel. Når du slepp opp museknappen vert sirkelen vist med ei prikkelinje («marsjerande maur»). Dersom det er nødvendig, kan du finjustera sirkelen ved å ta tak i ein av firkantane i hjørnet av rektangelet og dra dit du måtte ønskje.

Du finn meir om dette i Del 2.2.3, «Å forandra utvalet».

2.3.4. Innstillingar

Figur 14.16. Innstillingane for verktøyet «Ellipseutval»

Normalt vert innstillingane for det valde verktøyet vist under verktøykassa. Dersom dette ikkje er tilfelle, kan du få tilgang til dei frå biletmenyen via Vindauge → Dialogvindauge → Verktøyinnstillingar som vil opna verktøyinnstillingane for det aktive verktøyet.

	Notat
	Mange av innstillingane er felles for alle utvalsverktøya og er nærare omtalte i Innstillingar for utvalsverktøy. Berre innstillingar som er spesifikke for dette verktøyet er omtalte her.

Modus, kantutjamning og mjuke kantar: Felles innstillingar for utvalsverktøya.
Dei andre innstillingane: Dei andre innstillingane er dei same som verktøyinnstillingane for rektangelutvalet.