Gjennom åra har problem med skrifttypane gått igjen i svært mange av feilrapportane, sjølv om det har minka merkbart etter at GIMP 2.0 og seinare versjonar vart sleppte laus. I dei fleste tilfella har det vore dårleg utforma fontfiler som har skapt problem for Fontconfig. Dersom du får krasj når GIMP lastar skrifttypane, er den beste løysinga å oppgradera til ein Fontconfig nyare enn 2.2.0. Du kan også starta GIMP med kommandolinja --no-fonts, men kan då ikkje bruka tekstverktøyet.

Eit anna kjent problem er at Pango 1.2 ikkje kan lasta inn skrifttypar som ikkje inneheld Unicode bokstavsett. (Det er Pango som lagar tekstutforminga i GIMP). Mange av symboltypane hamnar i denne kategorien. På nokre system vil bruk av slike typar føra til krasj. Den enklaste løysinga er å oppdatera til Pango 1.4 eller høgare.

Ei velkjent kjelde til forvirring er når GIMP oppdagar ei øydelagt eller feil utforma skrifttypefil i Windows og sender ut ei feilmelding om dette. Det kan sjå ut som GIMP har krasja, men det er ikkje tilfelle. Lukkar du vindauget, vert GIMP avslutta. Difor bør du i staden forminska feilmeldinga og ignorera ho. Du kan då arbeida trygt vidare med GIMP. Årsaka til denne situasjonen er ein konflikt mellom Windows og dei biblioteka GIMP nyttar. Dette kan ikkje rettast på i GIMP. Du må leva med dette inntil vidare.