Dette verktøyet blir brukt når du har behov for å lage eit utval på frihand ved å teikna med musepeikaren medan du held nede den venstre museknappen. Når du slepp museknappen, vil det siste punktet i markeringa bli kopla saman med det første punktet med ei rett linje. Du kan gå på utsida av biletet og kome inn att, dersom du har behov for det. Lassoen er nyttig når du bare treng eit grovt og unøyaktig utval, men er dårleg eigna til å lage presise utval. Bruker du GIMP ofte, vil du kanskje finna at det er enklaste ofte å grovteikna med frihandsutvalet for deretter å bruke snarmaska for å finjustera detaljane.

Du kan finne meir om utvala og bruken av dei i GIMP i kapitlet Utval. Funksjonar som er felles for utvalsverktøya er omtalte i avsnittet Utvalsverktøya.

Frå og med GIMP 2.6 kan du også bruke polygonalutval. I staden for å klikke og dra eit frihandsutval, kan du lage utvalet bare ved å klikke inn ankerpunkt. Når du flytter musepeikaren utan å klikke på nytt, vil du få ei linje ut frå ankerpunktet. Når du klikkar igjen, blir også denne linja forankra og linja blir til eit segment. Held du nede Ctrl-tasten medan du flytter musepeikaren, vil du avgrense flyttevinklane til multiplar av 15°.

Du kan altså blande segment laga med frihandsteikning og segment laga med polygonale segment.